Синоптиклар Татарстанда ял көннәрендә һава торышы турында сөйләде

Татарстан Гидрометеоүзәге киләсе атна башына кадәр һава торышын фаразлады. Һава торышы сизелерлек үзгәрмәячәк.

26 гыйнвар, җомга көнне салкынча булачак: төнлә −11..-16 градус, аязганда −20 градуска кадәр. Көндез −7дән −12гә кадәр фаразлана. Урыны белән бераз кар явачак. Атмосфера басымы күтәреләчәк.

Шимбә көнне көньяк циклонның перифериясе тәэсирендә кар явуы көтелә. Зур булмаган буран чыгу ихтималы бар. Төнлә −8..-13 градуска кадәр суыта, көндез −4..-9 градус.

Якшәмбе көнне республикада бераз кар белән болытлы һава торышы көтелә. Һава температурасы шимбәдәге кебек булачак.

Дүшәмбе һәм сишәмбе төнлә −9..-14, көндез −3тән −8гә кадәр салкын булуы фаразлана. Кайбер урыннарда бераз кар яварга мөмкин.