КФУ метеорологы атмосфера басымы күтәрелү турында кисәтте

Татарстанда яшәүчеләрне атмосфера басымы күтәрелүе турында кисәттеләр. КФУның метеорология кафедрасы доценты Тимур Әүхәдиев хәбәр иткәнчә, якындагы тәүлектә басым терекөмеш баганасы буенча 9 мм га күтәрелергә мөмкин, бу метеосизгер кешеләрнең сәламәтлегенә тискәре йогынты ясый, дип хәбәр итә «Татарстан-24» телеканалы.

«Алдагы тәүлектә һава торышы үзгәрү белән атмосфера басымы да артачак. Мәсәлән, тәүлек эчендә ул терекөмеш баганасы буенча 9 мм га күтәрелергә мөмкин», — диде Әүхәдиев.

ТР Гидрометеоүзәге фаразлавынча, 20 февральдә республика территориясендә томан һәм бераз кар явуы көтелә. Көндез һава температурасы −5..-10 градус тәшкил итәчәк. Төнге сәгатьләрдә −18гә кадәр салкынайта.