Туган як

Чиратта — республика чемпионаты

Узган ял көннәрендә Түбән Кама көрәшчеләре Казанга, татар-башкорт милли спорт көрәше буенча республика чемпионатына барып кайттылар. Безнекеләрнең берсе - Балчыклы авылы егете, НПАТП генераль директоры урынбасары Ленар Иванов анда иң зур уңышка ирешкән. Ул - 100 килограммга кадәрге авырлык үлчәвендә Татарстан чемпионы! Бу үлчәүдә барлыгы 36 көрәшче бил алышып, Ленар...

Узган ял көннәрендә Түбән Кама көрәшчеләре Казанга, татар-башкорт милли спорт көрәше буенча республика чемпионатына барып кайттылар.

Безнекеләрнең берсе - Балчыклы авылы егете, НПАТП генераль директоры урынбасары Ленар Иванов анда иң зур уңышка ирешкән. Ул - 100 килограммга кадәрге авырлык үлчәвендә Татарстан чемпионы! Бу үлчәүдә барлыгы 36 көрәшче бил алышып, Ленар алты әйләнештә дә үзенең барлык көндәшләрен, шул исәптән, моңа кадәр республика ярышларында үзе өчен еш кына артык «каты чикләвек» булган Зөлфәт Хәсәновны (Биектау) һәм финалда Әлмәтнең танылган батыры Фәнил Минһаҗевны да җиңгән. Гомумән, Ленар Иванов соңгы елларда үзе катнашкан зур ярышларның берсеннән дә җиңмичә яки, иң кимендә, призлы «өчлек»кә кермичә кайтмады, ә мондый уңышлар очраклы гына була алмый. Данил Галиев исемендәге көрәш мәктәбе директоры Расиф Гыйльманов әйтүенчә, Ленар «Шинник» спорт комплексында кичләрен даими һәм ныклап шөгыльләнә, тырышлыгы белән күпләргә үрнәк итеп куярлык.

Түбән Каманың тагын ике көрәшчесе чемпионат призерлары исемлегендә: 80 килограммга кадәргеләр арасында - политехник колледж укучысы Илмир Төхвәтуллин, ә 130 килограммнан авырраклар арасында «Нефтехимик» спорт клубы инструкторы Марат Мөхәммәтҗанов өченче урыннарны алганнар.

Көрәшчеләребезнең калганнары түбәнрәк нәтиҗәләр күрсәтсә дә, телгә алынган өчесенең уңышы Түбән Кама командасына республика чемпионатында көч сынашкан 50 команда арасында 5нче урынга чыгу мөмкинлеге биргән. Бу - ярыйсы гына үсеш, чөнки безнекеләр күптәннән инде чемпионатта шактый түбәнрәк урыннарда калып килделәр (мәсәлән, узган ел 22нче урын белән канәгатьләнергә мәҗбүр булганнар иде). Ә быел, Теләче, Казан, Әлмәт һәм Чаллы командаларын гына алга уздырып, электән иң көчлеләрдән саналган Балтач, Мамадыш, Саба, Кукмара, Биектау һ.б. районнар көрәшчеләреннән өстен чыга алганнар.

Әлеге бәйгедә үз үлчәүләрендә беренче урыннарны яулаган көрәшчеләрдән республиканың җыелма командасы тупланып, алар татар-башкорт милли спорт көрәше буенча Россия чемпионатында көч сынашачак. Декабрь уртасында Башкортстан башкаласы Уфада үткәреләчәк ул бәйгедә Татарстан данын яклау ышанып тапшырылган җыелма командага Түбән Камадан Ленар Иванов та керә, дигән сүз.

Сүз уңаеннан, Уфадагы ул чемпионатта зурлар гына түгел, яшьләр арасында да аерым ярыш оештырыла. Татарстанның яшьләр җыелма командасында да безнең бер егет - быел 28нче мәктәпне тәмамлап, Түбән Кама медицина колледжына укырга кергән Эльвир Әхәтов булачак. Мондый хокукны ул апрель аенда, 1993-94 елгы көрәшчеләр арасында 60 килограммга кадәрге үлчәүдә республика чемпионы булуы нәтиҗәсендә яулаган иде. Ленарның һәм Эльвирның Уфада да сынатмауларын, Россия чемпионнары булып кайтуларын теләп торыйк.

Нравится
Поделиться:
Реклама
Комментарии (0)
Осталось символов: