Чаллыдан — уңыш белән

«Шинник» спорт комплексының Данил Галиев исемендәге көрәш мәктәбендә шөгыльләнүчеләр 10 декабрьдә Чаллы шәһәренә, 14-17 яшьлек үсмерләр арасында татар-башкорт милли спорт көрәше буенча шәхси беренчелек өчен ачык ярышка барып кайттылар.

Турнирда республикабызның егерме шәһәреннән һәм районыннан 200ләп спортчы бил алышкан. Бездән анда барган тугыз көрәшченең бишесе үз үлчәүләрендә уңышка ирешкәннәр: Булат Динмөхәммәтов, Инсаф Ямалов һәм Булат Вафин - җиңүчеләр, Ренас Кәлимуллин - икенче, ә Сергей Парфенов өченче урынны алган. Монда аларның тренеры Илнар Гәрәевнең дә өлеше зур.