Айдар Гыйлаҗев бронза медаль алды

«Нефтехимик» спорт клубында җиңел атлетика белән шөгыльләнүче Айдар Гыйлаҗев Россия кубогы өчен Мәскәү өлкәсенең Жуковский шәһәрендә үткәрелгән ярышта бронза медаль алды.

Җиңел атлетиканың үзе чыгыш ясый торган төрендә - каршылыклар белән 110 метрлы дистанциягә йөгерүдә Айдар өченче булып килде. Ул бу араны 14,14 секунд эчендә узды. Тренеры Олег Пермяков әйтүенчә, Айдар ил күләмендәге бу ярышка яхшы әзерлек белән барган, дистанцияне 14 секундтан кимрәк вакытта узарга өметләнгән, әмма аңа каршы искән көчле җил комачаулаган. Айдар гына түгел, көндәшләреннән күпчелегенең, җил сәбәпле, нәтиҗәләре көтелгәннән түбәнрәк булган. Кайберләре, хәтта, киртә-каршылыклы дистанцияне узганда егылган.