Ятимнәр квартирлы булды

Әлмәт, Мөслим, Зәй һәм Түбән Камадан барлыгы утыз ятим егеткә һәм кызга узган җомгада шәһәребезнең Ф.Табиев урамындагы 21нче йорттан бер бүлмәле квартир ачкычлары тапшыру тантанасы булды.

- Тормышыгыздагы дулкынландыргыч та, шатлыклы да көн бүген, - дип квартир алачак яшьләргә мөрәҗәгать итте муниципаль район башлыгы урынбасары Эльвира Долотказина. - Чөнки хыялыгыз тормышка аша, һәркайсыгыз квартир ачкычы аласыз.

Татарстан мәгариф һәм фән министры урынбасары Лариса Сулима да егетләрне, кызларны үз тормышларындагы зур вакыйга уңаеннан котлады. Бу махсус программа буенча, ун ел эчендә 1947 ятим балага квартир бирелгәнлеге, шул максаттан дәүләттән 1 миллиард 457 миллон сумга якын акча тотылганын әйтте. Һәм ул программаның Татарстан Президенты Рөстәм Миңнехановның аерым игътибар үзәгендә булуына басым ясады. Соңгы өч елда ятимнәргә «Госжилфонд» карамагындагы бу квартирлар яңа төзелгән йортлардан гына бирелә икән. Республиканың башка төбәкләрендәге ятимнәргә дә нәкъ менә безнең Түбән Камада квартир бирелү сәбәбе гади генә - промышленносте бик нык алга киткән шәһәрдә эш табу мөмкинлеге дә зур, яшәү өчен дә бик уңайлы...

Тантаналы шартларда квартир ачкычлары өләшенгәч, бәхетле егетләр һәм кызлар, җитәкчеләр белән берлектә, яңа йорт каршында фотога да төштеләр.

Квартир ачкычы тоткан егет-ләрнең берсенә - Илфат атлысына сүз каттым. Кама Тамагында туып, җиде яшенә кадәр шунда үскән ул. Үз сүзләре белән әйткәндә, «әнисенә бәйле сәбәпләр» аны, башта - үз районнарындагы приютка, аннан Алабугадагы балалар йортына илтә. Тугыз яшеннән алып, абыйсы һәм апасы белән, Мөслим районындагы Күбәк авылында яшәүче Хәсәншиннар гаиләсендә тәрбияләнә. Унтугыз яшьлек бу егет хәзерге вакытта Яр Чаллыда яши, «Татавтодорстрой»да эшли. Сөйләшә-сөйләшә, йортның беренче подъездындагы сигезенче катка күтәреләбез. Илфат, кулындагы ачкычы белән, квартир ишеген ача. Стеналарына ачык якты төстәге обой ябыштырылган, балкон тәрәзәләре пластиктан ясалган, идәненә матур линолеум түшәлгән...