Бар милләт бер сәхнәдә

Түбән Кама педагогия көллиятендә халыклар иҗатына багышланган шәһәркүләм конкурсның сайлап алу туры үтте.

Чыгыш ясаучы коллективлар - мәктәп укучылары, урта һөнәри белем бирү һәм югары уку йорты студентлары, предприятие хезмәткәрләре - барлыгы 50дән артык иҗат төркеме.

Һәрбер коллектив жюри әгъзаларына үзләре сайлаган халыкның гореф-гадәтләрен чагылдырган чыгыш тәкъдим итте. Монда татар җырларын, рус халык такмакларын ишетергә, башкорт, чегән биюләрен күрергә мөмкин иде. Чыгышлар 5 номинациядә бәяләнде: бию, вокал, халык җырлары, уен коралында уйнау, декоратив-гамәли сәнгать, халык ашлары. Соңгы ике бирем финал турына узучы коллективларга каралган. Ул 13 декабрьдә Илдус Садыйков исемендәге балалар һәм яшьләр иҗаты сараенда узачак.