11 кеше һәм 750 мең сумлык бурыч

Тукай урамындагы 1 йорттагы квартирларның берсендә яшәүче гаилә берничә ел дәвамында торак-коммуналь хезмәтләре өчен түләми, шул ук вакытта күршеләренә тыныч яшәргә ирек бирми.

Квартир хуҗаларын өйдә көндез туры китерү мөмкин түгел. Төнлә исә әлеге ишек артында кәеф-сафа кору, кычкырыш. Биредә пропискада 11 кеше, шуларның яртысыннан артыгы - балалар. Әмама аларның биредә яшәү-яшәмәүләре билгесез. Квартирда күптән су, ут, газ юк. Бурычны мәҗбүри түләтү турында суд карары бар. Әмма пропискада булганнарның берсе дә рәсми рәвештә эшләми. Җитмәсә фатир хосусыйлаштырылмаган. Мәсьәлә әлегә ачык кала.