Түбән Камада торба үткәргечләрне гидравлик сынауларның беренче этабы тәмамланды

Химиклар проспектындагы эшләрнең барышы тиздән йортларга кайнар су биреләчәген күрсәтә. Анда яңа торба үткәргеч монтажлау бара. Юл аша — Корабельная урамында — ул инде тәмамланган. Эшчеләргә терәкләр монтажлыйсы, торбаны лотоклар белән каплыйсы һәм участокны төзекләндерәсе генә калган.

«Безнең ишегалды» программасына кертелгән йортларда да шундый ук хәл күзәтелә. Киләчәктә аларда проблемалар килеп чыкмасын өчен, төзекләндерү алдыннан андагы челтәрләрне тулысынча алыштыралар.

«Бездә 11 подряд оешмасы бар. Аларда гомуми 140- 150 кеше һәм 40 берәмлектән артык махсус техника эшли. Әмма шул ук вакытта төзекләндерү буенча төгәлләнмәгән эшләр күп әле. Узган көз, кыш айларында, һава шартлары аркасында, тәмамлый алмаган идек. Шуларга өстәп, гидравлик опрессовкалардан соңгы эшләр. Хәзер каты өслек белән бәйле җәяүлеләр йөри торган урыннарда эшләргә тырышабыз», — дип сөйләде «Татэнерго» АҖ филиалы директоры Илнар Галимҗанов. 

Быелгы гидравлик сынаулардан соң да үтәләсе бурычлар аз түгел. «Опрессовка» барышында 120 кимчелек ачыкланган, шуларның 70 ен төзәткәннәр инде. Калганнарын тәмамлагач, җылылык үткәргечне эшләтеп җибәрергә мөмкин булачак. Әлегә шул сәбәпле 300 йорт кайнар сусыз калып тора. Моннан тыш, хәзер үзәк җылылык пунктларында (ЦТП) «опрессовка» бара. Аны 95 үзәк җылык пунктларының 54 ендә үткәргәннәр инде.

«Шулай ук якын арада без Үзәк җылык пунктын технологик яктан яңартуга керешәбез, бу — иске җиһазларны бөтенләй яңа мобиль насос төркемнәренә, җылылык алмаштыру җайланмаларына алыштыру. ЦТП шактый зур. Аның эчендә кулланучылардан өзмичә генә яңа җиһазлар җыярга мөмкинлек бар. Якынча көн-көн ярым эчендә без иске җиһазларнны яңасына алмаштырабыз. Өзеп тору вакытларын кыскартырбыз дип уйлыйм», — диде Илнар Галимҗанов.

Узган ел иң начар хәлдә булган 15 ЦТПны үзгәртеп корганнар. Быел исә 21 шундый ук объект каралган. Августтан подряд оешмасы эшкә керешәчәк. Аларга өч ай чамасы вакыт китәчәк. Параллель рәвештә киләсе елга реконструкция ясалачак пунктлар планы эшләнә. 

«Төзүчеләр проспектында безгә күп мәшәкатьләр тудырган 1нче Үзәк җылылык пункты бар. Кыш буе шундагы җитешсезлекләрне бетердек. Быел әлеге ЦТПдан 12 йортка тоташучы бөтен челтәрне алыштырабыз. Бу — 3 км 600 метрга якын. Торбаларны тулысынча алыштыру өчен күп вакыт таләп ителә, билгеле. Аның каравы бер алыштыргач, бу йортларга без бүтән әйләнеп кайтмаячакбыз. Быел безнең карамакта 5 шундый ЦТП бар. Аларда да челтәрләрне тулысынча үзгәртәбез», — дип аңлатты Илнар Галимҗанов. 

Хәзерге вакытта челтәрләрне планлы рәвештә алыштыру дәвам итә. Бу якынча 47 километр. Әлеге эшләрнең 50 проценттан артыгы төгәлләнгән. «Татэнерго» белгечләре барлык эшләрнең барышын күзәтчелеккә алган.

Анжелика Степанова