Түбән Камада 2026 елда өч заманча спорт мәйданчыгы барлыкка киләчәк

Түбән Камада 2026 елда өч заманча спорт мәйданчыгы барлыкка киләчәк, шуларның берсе — яңа микрорайонда.

Шәһәр Башкарма комитеты матбугат хезмәтендә сөйләүләренчә, Тынычлык проспекты буенча 92 нче йорт артындагы бушлыкта баскетбол һәм волейбол белән шөгыльләнү мөмкинлеге булган спорт зонасы җиһазландырылачак. Шундый ук мәйданчык 13 нче мәктәп территориясендә дә барлыкка киләчәк.

Шулай ук 29 нчы мәктәп территориясендә «Бизнес-спринт» федераль программасы буенча «акыллы» мәйданчык ачылачак. Ул барлык теләүчеләр өчен дә ачык булачак. Спорт зонасы футбол, баскетбол һәм волейбол сөючеләрне җыячак.