Татарстан синоптиклары кышкы челлә турында кисәтә

Татарстан гидрометеорология һәм әйләнә-тирә мохитне күзәтү идарәсе республикада бик суык булуы турында кисәтү таратты. Синоптиклар фаразлаганча, 9 гыйнварда республиканың көньягында 17-23 градус суык була, төньяк районнарда - 24-29 градуска, төнлә аязганда - 32 градуска кадәр. Казанда төндә 25-27, урыны белән 29 градуска кадәр салкын була, көндез - 23-25 градускача.

10 гыйнварда төнлә һава температурасы 24-29, түбән урыннарда аязганда 30-35 градуска кадәр җитә, көндез 15-20 градус, көнчыгыш районнарда 24 градуска кадәр суык фаразлана. Казанда төнлә термометр баганасы 27-29, урыны белән 33 градуска кадәр төшә, көндез салкыннар 16-18 градустан артмый.