2024 елда Түбән Камада 6 нчы мәктәп һәм 93 нче балалар бакчасы ремонтланачак

Киләсе елда Түбән Камада Тукай урамындагы 6 нчы мәктәптә һәм Тынычлык проспектындагы 93 нче балалар бакчасына капиталь ремонт ясау планлаштырыла.

НТР 24 телеканалында узган туры эфирда шәһәр мэры, Түбән Кама муниципаль районы башлыгы Рамил Муллин 2023 елда шәһәрдә дүрт мәктәп төзекләндерелүен искә төшерде.

«Быел без дүрт мәктәпне ремонтладык — бу зур җиңү. 19 нчы мәктәп һәм 2 нче гимназия республика программасы буенча төзекләндерелде. Федераль программа буенча без 7 һәм 21 нче мәктәпләрне яңарттык», — диде Рамил Муллин.

Шәһәр башлыгы Түбән Камада тагын 10га якын мәктәпнең ремонтка мохтаҗ булуын билгеләп үтте.