Түбән Кама автоинспекторлары рейд вакытында 18 хокук бозучыны тоткарлаган

28 февраль иртәсендә Түбән Камада узган «Тоннель» операциясе барышында ЮХИДИ инспекторлары юл хәрәкәте кагыйдәләрен бозуның 18 очрагын теркәгән. Бу хакта Дәүләт автоинспекциясенең матбугат хезмәте хәбәр итә.

Хокук бозуларның иң еш очрый торганы — куркынычсызлык каешын эләктермәү: бүген шундый 12 йөртүче ачыкланган.

Ике машинаның номерлары укылмый торган, өчесенең машина пыялалары рөхсәт ителгәннән артык караңгылатылган. 

Түбән Камада машина йөртүчеләрне тикшерү буенча рейдлар даими үткәрелә.