Түбән Каманың «Нардуган» ансамбле «Кыш бабай бул!» акциясенә кушылды

«Нардуган» ансамбле Яңа елга бүләкләр җыю буенча «Кыш бабай бул!» хәйрия акциясенә кушылды. Артистлар акциядә ел саен катнаша.

Кичә алар редакциягә килеп, бүләкләр сандыгын уенчыклар, китаплар һәм, әлбәттә, конфетлар белән тулыландырдылар. 13 нче лицей укучылары, туберкулезга каршы диспансер хезмәткәрләре дә уенчыклар һәм татлы бәйрәм җыелмалары белән килделәр.

«Без үзебезнең тату командабыз — «Нардуган» җыр һәм бию ансамбле белән барлык балаларны якынлашып килүче Яңа ел белән котлыйбыз! Аларның һәркайсы бу яңа елда теләгән бүләген алсын. Бәхет, сәламәтлек, барлык башлангычларда уңышлар телибез, — диде «Нардуган» профкомы рәисе Нияз Сәфиуллин.

Бүләкләрне Сез дә безгә Химиклар проспекты, 64а адресы буенча урнашкан редакциягә алып килә аласыз.