Муса Җәлилнең тууына 120 ел: Түбән Камада каһарман шагыйрьне искә алдылар

Муса Җәлилнең юбилеена багышланган шигъри митинг Лемаев мәйданында узды. Анда шәһәр учреждениеләре һәм оешмалары хезмәткәрләре, Бөтендөнья татар конгрессының җирле бүлекчәсе вәкилләре, язучылар, мәктәп укучылары һәм башка күпсанлы кунаклар катнашты. Алар татар халкының бөек улын хөрмәтләп, аның һәйкәленә чәчәкләр салдылар һәм шагыйрьнең батырлыгын искә алдылар.

Муса Җәлилнең тууына 120 ел тулуга багышланган «Батырлык юллары» муниципаль уку конкурсында җиңүчеләр, аның әсәрләрен укып, шагыйрьнең иҗатын тагын бер кат яңартырга һәм киң җәмәгатьчелеккә тәкъдим итәргә омтылдылар. Бу шигъри митингның максаты – яшь буынны Муса Җәлилнең әдәби мирасыннан рухландырып, аның батырлыгы белән горурланырга өйрәтү.

Түбән Кама муниципаль районы башлыгы Радмир Беляев билгеләп үткәнчә, шагыйрьнең юбилей елында шәһәрдә күпсанлы чаралар үткәреләчәк. Шуларның берсе – 26 февральгә билгеләнгән. Үткәрү урыны - Халыклар иҗаты йорты.