Туган як

Язучы

Төн ача зәңгәрсу пәрдәсен, Офыкта ал нурлар кызара.

Таңгача тәрәздә ут яна –
Кемнең соң
               йөрәге сызлана?
Ак кәгазь битендә 
                         вак эзләр,
Мәрҗәннәр тезелгән 
                        дисбе  күк.
Көн туа... Чакыра үзенә.
Ә сүзләр? 
      Ә сүзләр шундый күп.
Күңеле төседәй 
                        кәгазьдән
Каурый каләме йөгерә.
Йомгагы түгәрәк, 
                         җебе нык,
Чуалтмый, 
             ничек тә өлгерә!
Һичкайчан хатага  
                           хакы юк,
Халкының өмете аңарда.
Яклыйсын якларга,
                        саклыйсын
Сакларга тиеш ул 
                           дөньяда.
Тәңредән йөкләнгән 
                      зур бурыч –
Һәркемне иманга өндәргә.
Алып та күтәрмәс 
                           бу йөкне
Ул бара күтәреп иңнәрдә.
Гөләндәм ГАЛИЕВА.

Болын чәчәкләре
Болын чәчәкләре 
                     кулларымда,
Яна күзләр учак утыдай.
Кулда – бәйләм,
           йөрәкләрдә – сөю,
Шатлык ага елга суыдай.
Хисем ага 
               елга суларыдай,
Дулкыннары
                 чыга ярлардан.
Алсу-кызыл, 
           ак чәчәкләр җыям,
Тәкыялар үрәм алардан.
Туган якларымнан
                  китеп барыш,
Узды анда минем балачак.
Су буйлары, 
              болын чәчәкләре
Күз алдымда 
                 мәңге калачак.
Роза ШӘЕХОВА.

Мәңге яшь булып калырсыз
«Сүрәкә» керәшен фольклор ансамбле баянисты Флүн Фазлыев бу дөньядан яшьли – 55 яшендә китте. Авыр туфрагы җиңел булсын. Без аны бик сагынабыз. Ел саен бергәләп Сабантуй бәйрәмендә катнаша идек. Ә быел Сабантуй аннан башка гына булды шул...
Җәй саен мәйданда 
                    җыр-моңнар
Еракка-еракка тарала.
Шул Сабантуйлары 
                            яңарта
Тик сезнең 
               юклыкны арада.
Без – исән 
        дусларың, аңлыйбыз,
Дусларны ел саен
                       барлыйбыз.
Сез куйган 
         хезмәтләр югалмас,
Сезне искә алмый
                      калмыйбыз.
Сез – баянда, 
           ә без җыр сузабыз,
Тылсымлы көй –
              безгә зур ләззәт.
Дөньяларны гизеп 
                      уйный идең,
Ә безгә җыр – 
                 үзе бер рәхәт. 
Менә хәзер 
           өр-яңа җыр булып,
Ишетелә 
          сезнең җыр-моңнар,
Серле караш белән 
                    җыр сузулар,
Йөзегездә инде ай-нурлар.
Бүген менә  
          сез уйнаган көйләр
Кушылып аккан сыман 
                            дәрьяга.
Күпме хезмәт, 
          көч куйгансыз икән
Иҗатка үрелгән елларда!
Яз сыман 
         җылы да, дәртле дә,
Тынгысыз иде 
                   шул җаныгыз.
Гел шулай 
           көләч тә, сәләтле,
Мәңге яшь булып 
                   сез калырсыз.
Анастасия УСАЧЕВА, «Сүрәкә» керәшен фольклор ансамбле әгъзасы.
В. Темячева фотосы.
 

Нравится
Поделиться:
Реклама
Комментарии (0)
Осталось символов: