Шигъри тәлгәшләр
Урман
Кышны көтә инде җиһан,
Йокыга киткән урман.
Яңгыр катыш кары белән
Урамда уйный буран.
Болытлар җилкән киергән,
Юл буе – чуар келәм...
Җаныма тынычлык эзләп,
Мин, урман, сиңа киләм.
Агачларны тарап үткән
Җилнең тимер тарагы.
Ни пышылдыйсың җилләргә
Ялгыз усак яфрагы?..
Күңелемдә урман шавы,
Яшәешнең асылы.
Үзенә күрә матур ул –
Гомернең һәр фасылы.
Ралия КӘРИМОВА.
Карлы буран
Була кайчак
шундый карлы буран,
Йөрер сукмакларны
томалый.
Күз ачарга
ирек бирми, дулый,
Андый кышлар
бездә булгалый.
Җил тынганда,
безне үртәгәндәй,
Тынып тора
карын яшереп.
Ак каеннар
болай да ак инде,
Күмә чыршыларның яшелен.
Ә чыршылар
бары тик шатлана,
Җылы тунын
кигән кешедәй.
Яшел ылысларын акка буяп,
Тик елмая ак кар эченнән.
Анастасия УСАЧЕВА.
Иң мөһим һәм кызыклы язмаларны Татмедиа Telegram-каналында укыгыз
