Шигъри тәлгәшләр

Тыныч хезмәт белән 
                      ирешелсен
Илләрдәге муллык- 
                      байлыклар.
Берсен-берсе хөрмәт белән зурлап,
Яшәсеннәр иде халыклар.

Кешеләрнең 
       тыныч тормышына
Хезмәт итсен 
                уран-атомнар.
Сугыш, низаг 
           чыгармыйча гына,
Килешсеннәр иде 
                        хакимнәр.

Җир йөзендә сугыш, 
                 михнәт күреп,
Еламасын иде ятимнәр.
Тынычлыкны саклагыз, 
                    дип әйткән
Ут эченә кергән әтиләр.
Рәфыйк ӘХМӘДИЕВ.

Гомер аты
Гомер аты чаба, 
           туктап тормый, 
Сизелми дә аның узганы.
Күңел генә язлар, 
                   назлар көтә,
Ә чәчләрдә –
                еллар тузаны.

Шул тузанны 
           кагып төшерергә
Юк микән соң 
                берәр чарасы?
Чабар идем 
             кире яшьлегемә,
Гомер атын 
               ничек борасы?..
 Ралия КӘРИМОВА.