Туган як

Шигъри тәлгәшләр

Үсеш

Шәһәремә бүген 
                     ярты гасыр.
Җитмеш тулды инде 
                            миңа да.
Бер-беребезне һәрчак 
                    хөрмәтлибез,
Ныклы, ышанычлы
                          булганга,
Сәнәгатьнең төп
                  терәге булып,
Илгә куәт биреп 
                         торганга.

Җыелыштык 
           бәйрәм табынына.
Гаиләбез зур, 
             монда дүрт буын:
Әти-әни, онык-оныкалар,
Кызым, киленнәрем, 
                        дүрт улым.
Кыю, уңган, 
          хезмәт сөючеләр –
Барысы да минем уң кулым.

Балакайлар, диеп 
                  сүз башладым,
Нинди матур чорда 
                             яшибез!
Бу төбәккә аяк атлаганда
Олы түгел иде яшебез.
Беләк көчле, йөрәк 
                  дәртле булгач,
Олы булды безнең эшебез.

Беренчеләр булып 
                   килдек монда,
Нигезен салдык 
            биек йортларның,
Төзи-төзи, 
             булачак заводның
Кабындырдык
               факел-утларын.
Хәзер бизи 
           көмеш колонналар
Әрәмәле Чулман буйларын.

Завод цехларына 
                       кергән саен
Яшьлегемә кайта
                           уйларым.
Төзелешкә юллама 
                             алганда
Дөрес сайлангандыр
                          юлларым.
Авырлыкны җиңеп 
                     алга бардым,
Кыю булдым, 
             куркак булмадым.

Вакыт безне түгел, 
                    без вакытны
Куаладык кебек ул чакта.
Химкомбинат җимешен тиз өлгерттек.
Горурланып әйтәм 
                          бу хакта.
Шәһәребез – 
             химия башкаласы
Телдән-телгә күчә 
                          бар якта.
Шулчак минем сүзне 
                     дәвам итте
Өлкән улым – 
               шиннар остасы:
– Без ясаган 
          тәгәрмәчләр санын
Чикли алмый 
                  вакыт кысасы.
Алар үткән
            юлның озынлыгын
Санап чыгарып булмый, 
                            кыскасы.

Кайда гына юк ул 
                    тәгәрмәчләр,
Җир шарына охшаш –
                            түгәрәк.
Яшәешем фәлсәфәсен
                                 бүген
Алар этәрә күк түргәрәк.
Тост күтәрәм, 
              киләчәк көндә дә 
Табыныбыз булсын 
                           мөбарәк.

Үз фикерен әйтте 
                       оныгым да:
– Утсыз төтен булмый, 
                          сез хаклы,
Шәһәр-заводларны 
                        төзегәндә,
Хезмәт куйгансыз бит 
                           ничаклы.
Безнең бурыч – 
           сүндермичә саклау
Сез кабызган 
                    якты учакны.

Хыялыбыз – 
              һава сафландыру,
Төтен болытларын 
                         таратып.
Тирә-якны яшеллекә төрү,
Химия пычракларын 
                        тазартып,
Тәнгә сихәт, 
         җанга рәхәт биргән
Изге чишмәләрне 
                          яңартып.

Шул вакытта үсеш 
                тоткарланмас,
Кала гөлбакчага күмелер,
Ил байлыгы артыр, 
                        шәһәребез
Чит илләрдә танылыр, 
                            беленер.
Кырган эшләребез, 
                         гамәлебез
Тарих көзгесендә күренер...

Бәйрәм табынында 
                       хатирәләр,
Истәлекләр торды 
                             яңарып.
Киләчәккә кордык 
                       планнарны
Заманына карап яңартып.
Без бәхетле 
             туган җиребездә 
Яшәгәндә сөелеп, яратып.
Нур АБДУЛ.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: