Туган як

Гашыйклар утравында

Г.Тукай исемендәге китапхәнәдә уздырыла торган «Гашыйклар утравы» кичәсенә җырга-моңга гашыйк җаннар җыелган иде. Тальян моңнарына күмелгән әдәби чараны оештыручы, алып баручы китапханәче Гөлфия Мусина барыбызны да котлап, җыр дөньясына әйдәде. Бәйрәмгә тормыш иптәше Роза ханым белән парлап килгән Кәүсәр абый Камалиев, тальянда уйнап, «Үтте дә китте яшьлегем», «Ык буйлары», «Озату»...

Г.Тукай исемендәге китапхәнәдә уздырыла торган «Гашыйклар утравы» кичәсенә җырга-моңга гашыйк җаннар җыелган иде. Тальян моңнарына күмелгән әдәби чараны оештыручы, алып баручы китапханәче Гөлфия Мусина барыбызны да котлап, җыр дөньясына әйдәде.
Бәйрәмгә тормыш иптәше Роза ханым белән парлап килгән Кәүсәр абый Камалиев, тальянда уйнап, «Үтте дә китте яшьлегем», «Ык буйлары», «Озату» кебек моңлы да, сагышлы да борынгы җырларны профессионаллар югарылыгында башкарып, залдагыларны әсир итте. Җырчылар Рәхимә, Дамирә, Зәкия, Мария, Маргарита, Миңниса, Мәрзия, Флүрә, Диләфрүз апаларның җыр дулкынында ял итү рәхәт иде!
Бәйрәмгә рух өстәп, ир-егетләр дә матур шаян җырлар башкарды. Фаяз абый, Анатолий һәм Хәсән абыйларның җырлары күңелебезгә хуш килде. Һәр җырчының үз көе, тавышы, кабатланмас моңы, аһәңе күңелләрнең әллә кайсы почмакларына барып җитеп, еракларга, авыл якларына, яшьлеккә алып китте...
Авыллардан җыелган моңлы халык бит без татар халкы! Үзем дә рәхәтләнеп кушылып җырлап утырдым. Әти-әнием җырлаган борынгы моңлы көйләр мәгънәле, сүзләре гади. Ана телебез, туган телебез сагында торучы буын буларак, яшьләргә дә өйрәтеп калдырасы иде бу ядкарьләрне.
Кичә шигъри тәлгәшләр белән үрелеп барды. Алексеевскидан килгән кунак Рабига апа һәм Корбанбикә укыган шигъри дулкында тирбәлеп ял иттек, рухыбыз артты, җаннарыбыз рәхәтләнде. Кызыклы викторина сорауларына да җавап бирдек. Кичә барышында китапхәнәнең бүлек мөдире Әнфисә Фәйзетдинова халыкны бәйрәм белән котлады. Әйтеп узарга кирәк: 2016 елның августыннан «Яшьлегем чишмәләре» аралашу клубын башлап оештыручы Әнфисә Түбән Кама халкы өчен мөһим эш эшләде. Лаеклы ялга чыккач, узганнарны искә төшереп, җырлап-биеп, җан тынычлыгы алып китсеннәр, дигән максат куйган ул. Җәен Тукай паркында 3 ле, 8 ле биюләр, уеннар оештыруда дисеңме, барысында да аның өлеше бар. Әле яшь җырчыларның килеп кушылуы - үзе бер күңелле күренеш. Нургали абый Дәүләтшин гармунчы буларак, даими катнаша. Кавышкан - табышкан парлар да бар икән клубта. Җыр дөньясы - халкыбызның бай мирасы. Онытылып барган җырларга яңа сулыш өреп, җырның гомерен дәвам итүчеләргә олы рәхмәт. «Гашыйклар утравы»нда кунак булучылар бу мизгелләрне хәтерләрендә озак саклар әле.
Рәмзия ВӘЛИЕВА.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: