Туган як

Авыл үзгәргән

Тагын кайттым авылыма, Кайттым алтын көзләрдә.

Табигате һаман шул ук
Авыл гына үзгәргән.

Гөрләп торган авылыма,
Заман чире кагылган.
Эшләүче дә юк, эш тә юк,
Яшьләр киткән авылдан.

Таулар шул ук, тау астында
Чылтырый чишмәләре.
Болыннарда ишетелми 
Атларның кешнәүләре.

Урам тулып көтү керми,
Кичтән бикле йорт, капка.
Күрше күршегә йөрми,
Кая ул керү ятка.

Кояш баткач, авыл тынды,
Калгандай тормыш туктап.
Таң әтәче кычкырмады,
Чыккан кояшны котлап.

Үскән җирем дип, ялгызым,
Урамнар урап йөрдем.
Танымады авылдашын,
Түбән очта эт өрде.
Никифор Тукмачев
Фото pixabay.com сайтыннан.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: