Җавап эзлим, баш җитми

Җавап эзлим

Уйлап,  очына чыгалмыйм,

Әйтегез, кемнәр белә?

Берәү үксеп елаганда

Берәүләр нигә көлә?

Үземнең генә баш җитми,

Әйтегез, кемнәр белә?

Кешеләр ятып үләләр,

Агачлар - аягүрә.

Кояш түгел, җил яхшырак,

Киптерә нигә керне?

Яшәгән җир бер булса да

Кылган гамәлләр төрле.

Бер-бер артлы килгән көннәр

Ни белән аерыла?

Ник яратып кавышканнар

Ызгышып аерыла?

Кемдер кайгы дигәнен дә

Уздыра көлә-көлә...

Күпме сораулар җавапсыз,

Шул менә җанны телә.

рәсем пиксабай сайтыннан