Яушта юл булачак

Яуш авылының ике урамына гомуми озынлыгы 2437 метр булган асфальт юл салалар. Бу - федераль программа нигезендә эшләнә.
Сухрау авыл җирлеге башлыгы Ришат Галимов әйтүенчә, юлларны проектлаштыру, төзү белән «Татавтодор» шөгыльләнә. Хәзер өстәге кара туфрак катлавын алып, юлга кызыл балчык салалар. Эшләрне сентябрьгә кадәр тәмамларга исәплиләр. Аннан соң Смыловка авылына да юллар салыначак. Шушы ике авылдагы юл эшләре өчен, федераль бюджеттан 49 миллион сум акча күчерелгән.