Сабантуй

Балачактан бил алыша,
Көрәш сөя татарлар.
Пәһлеваннар мәйдан
                               тота,
Көч бирә җанатарлар.

Бәйге кыза, халык гөрли:
– Синнән көчле монда юк, 
Бирешмә, чү, ычкындырма,
Әйдә, егет, җиңеп чык!

Җиңү яулаган батырның
Озын сөлге кулында.
Көчле алкышлар озата
Аны барыр юлында.

Бил бирмәүче, 
                     җиңелмәүче
Батырлар үсеп торсын;
Илне данлап, җиңүчегә
Әләмнәр күчеп торсын!
Ралия КӘРИМОВА.