Иң яхшы фермерларның берсе

Районыбызның Кызыл Чапчак авылы фермеры Өлфәт Таипов республика күләмендәге конкурста җиңүчеләр исемлегенә керде.

"Ел эшмәкәре. Алтын йөзлек" конкурсы, Татарстан икътисад министрлыгы тарафыннан, 2013 елдан бирле уздырыла. Еллык эш нәтиҗәләренә карап, икътисадның төрле тармакларында аеруча югары күрсәткечләргә ирешкән 100 эшмәкәрне сайлап алалар. "Алтын йөзлек - 2015" исемлегенә Татарстан районнарыннан җиде фермер кергән, аларның берсе - райондашыбыз Өлфәт Таипов. Конкурста җиңүчеләрне бүләкләү тантанасында республиканың фермерлар, крестьян хуҗалыклары һәм авыл хуҗалыгы кооперативлары ассоциациясе рәисе Камияр Байтимеров әйтүенчә, ул - продукция җитештерүдә һәм аны эшкәртүдә аеруча нәтиҗәле эшләүчеләрнең берсе.