БЕР МИЧКӘ БАЛГА – БЕР КАШЫК ДЕГЕТ
«Химия шәһәрендә яшибез, сулаган һавабыз зарарлы, дип зарланырга яратабыз. Ә кайберәүләргә химия төтене генә аз күрәсең, һаваны тәмәке төтене белән дә агулыйлар. Мин – өлкән кеше, Химиклар урамындагы 94 нче йортта яшим. Квартирым – беренче катта. Барыбер ишегалдына еш чыгып йөри алмыйм. Урамны тәрәзәдән генә күзлим. «Саф һава»ны да форточка аша гына сулыйм. Дөресрәге, миңа һава урынына, тәмәке төтене суларга туры килә. Инде менә күпме вакыт тәрәзәдән тәмәке исе кереп, бүлмәләрдә чыдарлык хәл калмый. Соңгы вакытларда көннәр кызу булгач, тәрәзәне ачып, бүлмәләрне җилләтәсе килә. Ә аны ачсаң, тәмәке агуы керә. Бу минем сәламәтлеккә бик начар тәэсир итә.Тартмаучы башка күрше-күлән дә шундый фикердәдер. Буылып ютәлли башлыйм. Белүемчә, җәмәгать урыннарында тәмәке тарту тыела. Чөнки тирә-яктагы тартмаучы кешеләрнең сәламәтлегенә дә зыян килә. Балконда тартканда башка кешеләр дә сулый бит аның зәһәр төтенен. Беркөнне, тартканын сизеп, күршемә кисәтү ясаган идем: «Балконда тартуны закон тыймый», – дип кенә җавап бирде. Гражданнарның сәламәтлеген кайгыртмаган законның нигә кирәге бар икән?! Башкаларны санга сукмаучы шундый бәндәләргә бернинди чара да юкмы икән? Л.Габитова»
РЕДАКЦИЯДӘН: газетаның шушы саныннан башлап, яңа рубрика ачабыз. Ул «Бер мичкә балга – бер кашык дегет» дип атала. Моны ничек аңларга? Чыннан да, соңгы елларда шәһәребез матурлана, кешеләрнең мәдәният дәрәҗәсе үсә, Аллага шөкер, табыннарыбыз мул – шулай балда-майда йөзгәнгә куанып кына яшәргә дә бит... Тик, «Бер мичкә балга – бер кашык дегет» дигәндәй, тормыш-көнкүрешебезнең бер кечкенә генә почмагында җитешсезлекләр, кимчелекләр күреп аласың да, бөтен кәеф бозыла. Их, дип куясың, нигә болай икән?!
Хөрмәтле газета укучыларыбыз, бәлки сезнең дә шундый матурлыкны бозып торган ниндидер күңелсез күренешләргә тап булганыгыз бардыр, яшәешебезнең ямен җибәрә торган кимчелекләрне дә күргәлисездер. Шулар хакында редакциягә языгыз, яисә телефоннан әйтсәгез дә була. Ә без аны «Бер мичкә балга – бер кашык дегет» рубрикасы астында бастырып чыгарырбыз. Тормыштагы әнә шул китекләрне башкалар да күрер. Кем белә, бу хәлгә гаепле кешеләр, үзләрен «танып», килеп туган хәлне төзәтү ягын да карарлар, бәлки. Һәрхәлдә, шуңа өметләник.
Иң мөһим һәм кызыклы язмаларны Татмедиа Telegram-каналында укыгыз
