«Аксакаллар иҗтимагый эшләрдә актив катнаша»

Әңгәмәдә Түбән Кама мэры урынбасары Марина Камелина, башкарма комитет җитәкчесенең социаль мәсьәләләр буенча урынбасары Айзат Мәхмүтов һәм башка идарә башлыклары катнашты. 

Очрашуда иҗтимагый оешма эшенә йомгак ясалды. Әңгәмәне Васил Камалов ачты, ул шәһәр һәм район аксакалларының эшчәнлеге турында сөйләде.

«Түбән Кама аксакаллар шурасы — Татарстанда аксакалларның беренче иҗтимагый оешмаларының берсе. Мондый оешма республикада нибары биш кенә. Түбән Кама аксакаллар шурасында 31 кеше тора, алар арасында төрле тармак вәкилләре: беренче төзүчеләр, химиклар, табиблар, укытучылар бар. Алар шәһәр һәм районның иҗтимагый тормышында актив катнашалар, мәктәпләрдә һәм балалар бакчаларында зур эш алып баралар. Территорияне яратырга, сакларга һәм үстерергә, үткәннәр белән горурланырга, киләчәк турында уйларга чакыралар», — диде шура җитәкчесе. 

Шулай ук Мансур Шәрәфетдинов, Фирдәвис Ханов чыгыш ясады. Сөйләшү барышында мәгариф, мәдәният, татар телен саклау, үсеп килүче буынны тәрбияләү, шәһәр һәм районның инфраструктура үсеше темалары күтәрелде. Өлкәннәрнең барлык сорауларын, үтенечләрен һәм тәкъдимнәрен Рамил Муллин исәпкә алды һәм аларның күбесе якын арада хәл ителәчәген белдерде.

«Түбән Кама муниципаль районы Советы исеменнән яшь буынны үткәннең иң яхшы традицияләрендә тәрбияләүдә һәм гражданлык позициясен үстерүдә актив эшчәнлегегез өчен рәхмәт белдерәм, — дип ассызыклады Рамил Муллин. — Сез башкалар күрмәгән күп нәрсәләрне күрәсез һәм сизәсез. Безгә барлык мәсьәләләрне бергәләп хәл итү бик мөһим. Шуңа күрә мин тормышыбызның төрле юнәлешләрендә эшләү буенча сездән тәкъдимнәр бирүегезне сорыйм. Безнең бурыч — тәкъдим ителгәннәрнең күбесен гамәлгә ашыру өчен иҗтимагый инициативалар җыю. Бурычлар куегыз, инициативалар күрсәтегез, без аларны үтәячәкбез».

Йомгаклау өлешендә Аксакаллар шурасының актив вәкилләренә рәхмәт хатлары тапшырылды.

Халисә Шәйхетдинова, массакүләм мәгълүмат чаралары белән элемтә бүлеге белгече