Түбән Камада сәяси репрессияләр корбаннарын искә алдылар

Түбән Камада бу датага багышланган чара 12 нче мәктәптә узды. Теләге булган һәркем сәяси репрессия корбаннарына багышланган музейны карый алды.

Исегезгә төшерәбез, 1921 елдан алып 1953 елга кадәр бөтен ил буенча зур күләмле кулга алулар була. Татарстанда бу вакыт эчендә 54 меңнән артык кеше төрле җәзаларга дучар ителгән. Ә менә хәзерге Түбән Кама территориясендә 388 кеше кулга алынган булган. Бүгенге көндә репрессия корбаннарының инде берсе дә юк, шуңа күрә залда хөрмәтле кунаклар сыйфатында репрессияләнгән якташларның балалары утырды.