Түбән Камада ата-аналар балалар бакчаларында җылылык бирүне сорый

“Аномаль салкын һава торышы инде икенче атна – төркемнәрдә салкын, балалар туңа һәм чирли”, – дип язалар.

Бер баланың анасы сүзләренчә, аларның балалар бакчасында һава температурасы – 14 градус.

“Башка сыймаслык хәл. Балалар бакчасында бик салкын, яследә балалар киемдә йоклыйлар”.

“Төркемдәге 22 баланың 10ы авырып китү сәбәпле язылган!!! Барысы да маңкалый, ютәлли!!!”.

Түбәнкамалылар сөйләвенчә, республиканың башка шәһәрләрендә, мәсәлән, Әлмәттә мэр инициативасы белән 54 балалар бакчасына hәм Зәйдә үзәк район хастаханәсенең стационарына һәм балалар бакчаларына кабат җылылык биргәннәр.

Хәзер һава температурасы климат нормасыннан 6-8 градуска түбәнрәк. Тик бу атна ахырына синоптиклар +19га кадәр җылынуны фаразлый.