Хәрби бурыч һәм хәрби хезмәткә кагылышлы закон нигезендә, бу язгы чакыруда шәһәребез һәм районыбызның 250ләп егете сроклы хезмәткә китәчәк. Алар Россия Кораллы көчләренең төрле гаскәрләрендә хезмәт итәчәкләр. Сәламәтлекләре беренче категорияле булган 30-35 якташыбызның Тольяттидагы спецназ частена эләгү мөмкинлеге бар. Бу аңлашыла да, чөнки алар «Патриот» үзәгендә һәм элекке КАИ филиалында...
Хәрби бурыч һәм хәрби хезмәткә кагылышлы закон нигезендә, бу язгы чакыруда шәһәребез һәм районыбызның 250ләп егете сроклы хезмәткә китәчәк. Алар Россия Кораллы көчләренең төрле гаскәрләрендә хезмәт итәчәкләр.
Сәламәтлекләре беренче категорияле булган 30-35 якташыбызның Тольяттидагы спецназ частена эләгү мөмкинлеге бар. Бу аңлашыла да, чөнки алар «Патриот» үзәгендә һәм элекке КАИ филиалында алдан ук беренчел хәрби һәм физик хәзерлек узалар.
Бу юлы хезмәткә чакырыласы егетләребезгә повесткаларны микрорайон советлары җитәкчеләре тарата, хезмәткә китүчеләргә кесә телефоннары бирелә. Алар, командирлар рөхсәте белән, атнага 1-2 мәртәбә үзләре теләгән кешеләр белән элемтәгә керә алачаклар. Бу елның беренче гыйнварыннан сроклы хезмәттәге солдатның шәхси исәп-хисап карточкасына аена 2000 сум акча күчеп барачак. Бу, беренчедән, солдатның акчасын беркем дә «кыса» алмаячак, икенчедән, хәрби хезмәттән соң эшли башлаганчы яшәр җае булачак, дигән сүз.
Тагын бер яңалык: кайбер яшьләрне хәрби хезмәткә барудан шөлләтә торган «дедовщина»ны бетерү максатыннан, казармаларда һ.б. урыннарда видеокамералар куя башлаганнар. Шулай итеп, сроклы хезмәттәге солдат, сержантлар тәүлек буе күзәтү астында булалар.
Хәрби хезмәтнең стажга кергәнен әйтеп үтү дә кирәктер һәм армиядән кайткан егетләребезне, беренче чиратта, эшкә алырга тиешләр. Бу - закон буенча каралган, ә моңа кадәр армиядән кайтучылардан да эшкә урнашканда стаж таләп итәләр иде бит.
Хәрби комиссар Фәрит Миңгәрәев, армиягә алынучы егетләребезнең хезмәт кенәгәләрендәге язуда предприятиеләрнең кадрлар бүлеге тарафыннан, «үз теләге белән» дип түгел, ә «хәрби хезмәткә чакырылу сәбәпле» дип күрсәтү зарурлыгын ассызыклап әйтте. Шулай эшләгәндә, хезмәттән кайткан солдатны, бернинди каршылыксыз, үз урынына эшкә алырга тиеш булалар. Быел безнең Түбән Камада армиядән кайткан 36 егет льготалы шартларда (укыган өчен акча түләмичә) институтка керү хокукына ия булачаклар, әлбәттә, хезмәт иткән урыннарыннан бирелгән характеристикалары да зур роль уйный.
Күпме «уклонист»ларны җәзага тарттыгыз, дигән соравыма, «хәрби комиссариатның бурычы җәза бирү түгел, ә яшүсмерләребезне хәрби хезмәт аша чын ир-егетләр итеп тәрбияләү» дип җавап бирде хәрби комиссар. Башка ул турыда сүз кузгату урынсыз иде, чөнки алар болай да үзләрен җәзалыйлар ич. Күз алдыгызга китерегез инде, 27 яшькә кадәр укырга да, эшкә дә керә алмыйча йөриләр, төпле һөнәр дә ала алмыйлар, яшәү өчен акча да кирәк. Җинаятьче кебек кача-поса яшәү җиңел түгелдер ул.
Ф.Миңгәрәев армиягә алынучы егетләребез Ватан алдындагы бурычларын намус белән үтәсеннәр, әти-әниләре йөзенә кызыллык китермәсеннәр, дигән теләк белдерде.
Әйе, мин дә хәрби кием киячәк егетләребезгә сроклы хезмәттә уңыш, исән-сау әйләнеп кайтуларын телим. Ә инде 20 яшькә җиткәч тә әниләре итәгеннән аерылырга батырчылык итмичә, ишектәге кыңгырау шалтыраган саен, «повестка китергәннәр» дип калтырап яшәүче «күсәк»ләргә ир-егет исеме әрәм, буыннары сыек ул маңкалар үзләре һәм шундый «малай» үстергән әти-әниләре кызганыч.
