Туган як

Изге эшләрдә өлешләре зур

Менә без – керәшеннәрнең җәйге көннәрдә уза торган иң күңелле бәйрәмнәренең берсе – Питрау бәйрәме дә җитте. Файдалы үләннәр җыя, мунча себеркеләре ясый торган вакыт.

Балчыклы авылы халкы «Питрау»га тәрәзә йөзлекләрен, капкаларны яңартып буярга ярата, йорт тирәләрен тәртипкә китерә. Зиратларга барып, үлгәннәрне искә ала торган йола да бар. Пётр белән Павел апостоллар исемендәге чиркәвебез дә торгызылгач, бәйрәмнәр икеләтә күңелле үтә. Чаңнар кагып, бик матур, оста итеп җыруларын җырлаучы дин әһелләребез – поп Вячеслав атабыз һәм Мария анабыз авылдашларыбызның күңеленә бик хуш килә. 
Бәйрәм уңаеннан, чиркәүне күтәргәндә күп көчләрен керткән авылдашларыбызны да искә аласы килә. Депутатыбыз Юрий Иванов бу зур эшне үз өстенә алып башлаганы өчен, үзе дә гомер буе данлаулы булсын. Никитин Василий дәдәйнең улы Юрий Никитин зиратларыбыздагы искергән агачларны кисеп, чистартып тора. Василий дәдәй үзенең соңгы көннәренә кадәр, хәлсезләнгән вакытларында да зиратыбызны тәртиптә тотты, улы да әтисенең эшен дәвам итә. Анатолий Маркелов чиркәү нигезләрен күтәреп, тимердән коймалар койдырып, бик матур чәчәкләр, куаклар утыртты. Келәтле авылы егете, Балчыклы кияве Геннадий Муллин үз авылында да бик күп эшләр эшли, безнең чиркәүнең алтарен ясарга да булышты. Керәшеннәрнең «анасы», барыбызны тотып торучы рәисебез, базар комплексы директоры Тамара Баһаветдиновага Ходай озын гомер бирсен. Ул – безнең бик күркәм кешебез. 
Иганәчеләрнең һәм мондый изге эшләрдә катнашучыларның барысын да санап чыгу һич мөмкин түгел. Аларның барчасына бик зур рәхмәт. Үпкәләп калучылар булмасын иде. Барыгыз алдында да баш иябез.
Бәйрәмнәр күңелле, изгелекләр белән узсын!
Балчыклы авылы халкы исеменнән,
Анастасия ЧУРАШОВА.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: