Туган як

Аллаһ йортына - баскыч

Гагарин урамында төзелә торган мәчетнең ишегалдын төзекләндерү эше бара. Җәй дәвамында җәяүлеләр йөри торган юлларга 600 кв. метрга якын брусчатка җәелде, газоннарның бер өлешенә үлән чәчелде, мәчет бинасының тирә-ягына, нигезгә су кермәслек итеп, асфальт түшәлде һәм бордюрлар урнаштырылды. Бүген урамнан мәчеткә керү урыннарында баскычлар көйләнелә. Баскычларның нигезе һәм ян-яклары инде...

Гагарин урамында төзелә торган мәчетнең ишегалдын төзекләндерү эше бара. Җәй дәвамында җәяүлеләр йөри торган юлларга 600 кв. метрга якын брусчатка җәелде, газоннарның бер өлешенә үлән чәчелде, мәчет бинасының тирә-ягына, нигезгә су кермәслек итеп, асфальт түшәлде һәм бордюрлар урнаштырылды. Бүген урамнан мәчеткә керү урыннарында баскычлар көйләнелә. Баскычларның нигезе һәм ян-яклары инде арматурлы бетон белән ясалган. Зәвыклы итү максатыннан, бетонны махсус плитә белән тышларга керешелде.
Эшне дәвам иттерү өчен, матди чыгымнар таләп ителә. Шул максаттан, «Аллаһы йортына - баскыч» дип аталган махсус акция оештырырга ниятләдек. Баскычның бер басмасын плитә белән тышлау 3000 сумга төшә, ә баскыч мәйданчыклары - зурлыгына карап, 8000нән алып 15000 сумга кадәр.
Бер кеше, яки бер гаилә, кайсы да булса бер басма, яки баскыч мәйданчыгын тышлау бәясен түли ала. Әйтик, бер мөселман Гагарин урамы ягыннан керә торган урындагы баскычның беренче басмасын үзе төзетергә тели, ди. Ул шушы яңа мәчеткә килә һәм каравылчы бабайга 3000 сум акчасын бирә. Каравылчы ул сумманы һәм акча бирүченең кайсы басма өчен түләгәнен махсус исемлеккә терки.
Әлбәттә, ислам динендә эшләнгән изге эш белән мактану киңәш ителми. Чөнки мактану - изге эшнең савабын бетерә. Ләкин кешегә Аллаһы йорты булган мәчет төзелешенә үзе керткән конкрет өлешне тою хисе хас. Чөнки бу гамәл аны кыямәт көнне яклаучы булып килә. Аллаһыга иман китергән һәрбер кеше бу хиснең җан җылысы булганын аңлый.
Акция башлануга ук, бер эшмәкәр, хәтта, 10000 сумлык баскыч мәйданчыгы өчен акча бирде. Ләкин басмалар саны барлыгы 45 һәм әле 11 баскыч мәйданчыгы бар. Шуңа күрә әле акча түләнмәгән басмалар мөселманнарның Аллаһы йортына кертәсе өлешләрен көтәләр.
Ишегалдын төзекләндерү алып барылса да, мәчет эшли. Кичке укуларга йөрергә теләүчеләргә, яңа мәчет бинасына килеп, вахтада утыручы дежур бабайга мөрәҗәгать итәргә кирәк. Укулар шәһәр үзәк мәчетендәге уку-укыту программасы буенча алып барыла. Һәр атнаның ике көн дәвамында өчәр дәрес укыйсы. Вакытын үзегез сайлыйсыз: кемгәдер - иртәнге яктан, кемгәдер - көндез, ә кемнәргәдер эштән соң кич уку уңайлырак. Укулар өч юнәлеш буенча алып барыла. Шуларның берсе - дин нигезләре. Монда һәрбер мөселман белергә тиешле иман нигезләре, шәригать хөкемнәре, Коръән уку һәм әдәп-әхлак белеме бирелә. Бу курсны бетерүчеләргә имам вазыйфалары (никах, исем кушу, җеназа) өйрәтелә. Теләгән кешеләргә гарәп теле дә укытылачак.
Шулай ук, яңа мәчет, Коръән мәҗлесләре үткәрү, никах, исем кушу кебек дини мәрасимнәр уздыруда да ярдәмгә килә. Анысы өчен дә мәчет вахтасына мөрәҗәгать итәргә яки 42-92-29 номеры белән телефон аша шалтыратырга була. Никах укытырга теләүчеләр исә, иң элек, шәһәр үзәк мәчетендә әңгәмә үтәргә (һәр атнаның чәршәмбе һәм шимбә көннәрендә 13.30 сәгатьтә) тиеш булалар. Шул вакытка үзәк мәчеткә бара алмаучылар инде шушы әңгәмәне үткәрүче хәзрәткә шәхси рәвештә мөрәҗәгать итә алалар.
Йомгаклап шуны әйтәм, үзебезнең яңа мәчеттә гыйбадәт кылу да, дини белем бирү дә, дини мәрасимнәр оештыру да башкарыла.
 

Нравится
Поделиться:
Реклама
Комментарии (0)
Осталось символов: