Транспорт, төзекләндерү һәм юллар турында

Радмир Беляев үзенең беренче «туры элемтә»сен киләчәккә планнары белән уртаклашудан башлады. Күп эшләр башкарасы бар, диде ул. Аларның кайберләре эшләнә дә инде. Түбән Кама шәһәрен һәм районын төзекләндерү һәм үстерү өчен бүленгән акчадан гына да эшнең никадәр күләмле булуын чамаларга мөмкин. 

«Социаль-икътисади үсеш күзлегеннән караганда, тотрыклы барабыз. Төзелеш буенча планнар күп, бу мәсьәләдә рекордлы күрсәткечләр. Юл инфраструктурасын яңартуга 3 миллиард сум тирәсе, шулай ук социаль объектлар буенча 4 миллиард сум акча каралган. Бу мәгариф һәм спорт объектларын капиталь төзекләндерүгә тотылачак. Шәһәр күзгә күренеп үзгәрә, төзелеш-монтаж эшләре алып барыла», — дип сөйләде Радмир Беляев. 

Җылылык челтәрләрен модернизацияләү буенча да зур эшләр көтә. Әле кайчан гына иң «авыр тема» булып торган тармак, ышанычлы рәвештә «савыгу»га бара. Иң проблемалы участоклар ремонтлана. Бүген барлык көчләр еллар буе җыелган проблеманы хәл итүгә юнәлдерелгән. 

«Татарстан Республикасы Рәисе ярдәме белән, быел төрле чыганаклардан 2,4 миллиард сум акча җылылык челтәрләрен модернизацияләүгә юнәлдерелгән. Әлбәттә, кайнар су булмау мәсьәләсе борчый. Әмма кышын җылылык һәм кайнар су тотрыклы булсын өчен, җәй көне бераз түзәргә кирәк», — дип билгеләде Радмир Беляев. 

Шәһәрдә яшәүчеләрне җәйге сезонда иң актуаль сорауларның берсе — кешеләрне бакча массивларына йөртү мәсьәләсе борчый. «Без бюджеттан 100 млн сум акча бүлеп бирәбез, саннарны арттырабыз, шәһәрдә пассажирлар йөртүне субсидиялибез. Бездә 50 автобус эшли, һәм тагын тугыз зур сыйдырышлы автобус бар, киләчәктә тагын 10 автобус сатып алу юлларын эзлибез. Җәмәгать транспортын яңартырга планлаштырабыз», — дип аңлатты башкарма комитет җитәкчесе. 

Транспорт, юллар, дамбаны төзекләндерү, яшелләндерү, яңа микрорайоннар инфраструктурасы, торак фондын ремонтлау — «туры элемтә» барышында 25 тән артык сорау бирделәр. Һәркем җентекле җавап ишетте. Телевизор караучылар, телефоннан шалтыратып, Радмир Беляевка үзләрен борчыган сорауларны бирә алдылар. Алар барысы да шәһәрнең иҗтимагый тормышына кагылган: МХО, шәһәр зиратын төзекләндерү, ташландык биналар... Бу, беренче чиратта, үзләренең туган шәһәрләрен яратучы һәм аның язмышы өчен борчылучы битараф булмаган кешеләр яшәвен тагын бер кат исбатлый, дип билгеләп үтте моны Радмир Беляев. 

«Бу бик зур җаваплылык. Без — куәтле икътисади үзәк, Россиянең нефть химиясе башкаласы. Түбән Каманың киләчәге бик матур, бездә матур яшәү өчен барысы да бар. Мине шәһәребездәге яхшы атмосфера илһамландыра», — дип уртаклашты ул. 

Туры эфирның бер сәгатьлек марафоны килгән сорауларның да үз эченә ала алмады. Ләкин аларны игътибарсыз калдырмаячаклар. Һәркемгә җавап биреләчәк.

«Безнең халык белән аралашу бер ләззәт. Без шунда ук нишләргә кирәклеген, шәһәрдә нинди өстенлекләр барлыгына йөз тотабыз. Һәм, «туры эфир»га без бик игътибар белән әзерләндек, һәр мөрәҗәгатьне карадык, алар 200 дән артык. Без аларның барысын да аерым төркемнәргә бүлдек. Барлык сорауларга да җавап бирербез», — дип ышандырды Радмир Беляев. 

Аралашуның мондый форматы алга таба да дәвам итәчәк. Тәҗрибә күрсәткәнчә, ул үз нәтиҗәләрен бирә. Телевизор караучылар аны көтә, турыдан-туры трансляциянең нәтиҗәле күрсәткечләре шул турыда сөйли. 

«Турыдан — туры элемтәул һәрвакыт ачык диалог, һәр шәһәр кешесе җитәкчегә шәхсән үзе сорау бирә ала. Һәркем ишетергә тели һәм, әлбәттә, бу практиканы без алга таба да дәвам итәчәкбез», — дип ассызыклады «Татмедиа» АҖнең «Түбән Кама — информ» филиалы җитәкчесе-баш мөхәррире Алена Дёмина.

Анастасия Шакирова