Педагог-тәрбияче Рәзилә Шәмсетдинова: «Волонтерлык — күңел халәте»

«Әгәр солдат тук, сәламәт һәм сыйфатлы коралларга ия булса, аның тормышын саклап калу мөмкинлеге зуррак», — дип саный безнең педагог-тәрбиячебез Рәзилә Шәмсетдинова. Ул җәмәгатьчелекне, мәктәпкәчә учреждениеләр, мәктәпләр, оешмалар хезмәткәрләрен һәм шәһәрдәшләребезне сугышчыларыбызга актив ярдәм күрсәтүгә җәлеп итүчеләрнең берсе. 

Рәзилә Шәмсетдинова танк училищесында һәм ЭКСПОда мобилизацияләнгән егетләрнең көнкүреше белән танышудан башлый. Өч һәм аннан да күбрәк балалары булган солдатларны кире кайтару буенча актив эш алып бара, депутатларга мөрәҗәгать итә. Студентлар урамындагы 13 нче йортта маскировка челтәрләре үрә, шәһәр предприятиеләренең берсендә эшләүче егетләре белән гуманитар ярдәм җибәрүне оештыра. Бер үк вакытта балаларга патриотик тәрбия бирү белән дә шөгыльләнә: мәктәпләрдә класс сәгатьләре һәм коры душ ясау буенча осталык дәресләре үткәрә. Ул бу эшләргә «Адымнар» педагогларын һәм укучыларын да җәлеп итә, алар маскировка челтәрләре үрә, солдатларга хатлар яза, шәмнәр ясый, гуманитар ярдәм җыя. Аннары Идел буе федераль округының Татарстан кадетлар корпусыннан кадетларны да җәлеп итәләр. 

Волонтер ханым, шулай ук Чирмешән храмына барып, маскировка челтәрләре үрү тәҗрибәсе белән уртаклаша, соңрак ул тәҗрибә Югары Чаллы балалар бакчасы хезмәткәрләренә дә тапшырылды. 

Рәзилә Тимергали кызы — «Вместе мы можем больше» волонтерлык хәрәкәте штабы әгъзасы да әле. Бу оешма белән «Яңа кешеләр» («Новые люди») партиясе кандидаты Лариса Нуриева җитәкчелек итә. Л. Нуриева сугышчыларга гуманитарканы позицияләргә шәхсән үзе илтә «Торак» идарәче компаниясе җитәкчесе Н. Суслин һәм А. Гурьянов белән бергә ай саен безнең сугышчыларга төрле юнәлешләргә гуманитар ярдәм җибәрелә.

Безнең хезмәткәр Р. Шәмсетдинова шәһәрдә күп кенә волонтерлык хәрәкәтләре — «Татарстан гуманитаркасы», «Благо», «Маскировка челтәрләре», «Түбән Кама. Булдыра алганча ярдәм итәрбез», «Мәрхәмәтле йөрәкләр», «Крылья ангела», Югары Чаллы авылының «Игелек» төркеме волонтерлары, Татарстан Республикасының Балтач, Актаныш, Мөслим районнары һәм Казан шәһәре волонтерлары белән белән тыгыз хезмәттәшлек итә. «Бердәмлектә — көч!» — ди Рәзилә Тимергали кызы. Волонтерларның барлык төркемнәре бердәм эшләргә тиеш.

Ул безнең 49 нчы балалар бакчасына эшкә 2022 елда урнашкан иде. Бакча мөдире Рәдинә Хәйдәрова ярдәме белән ул үзиреклеләр хәрәкәтенә барлык хезмәткәрләрне дә җәлеп итте. Безнең балалар бакчасы базасында «Пчелки» үзиреклеләр төркеме оештырды, алар сугышчыларыбыз заказы буенча даими рәвештә маскировка челтәрләре, шлемнар үрәләр, коры душ ясыйлар. Шулай ук Рәзилә Тимергали кызы гуманитар ярдәм җыюга башка балалар бакчаларын да җәлеп итә, үзебезнең бакчада да шундый үзәк оештырды.

«Пчелки» төркеме 7 кешедән тора. Алар вакыт белән исәпләшмиләр. 68 яшен тутырган Лилия Изаил кызы мәсәлән төшке аш вакытында да маскировка челтәрләре үрә. Кече тәрбиячеләр Альмира Әсгам кызы, Энҗе Равил кызы, кастелянша Кифая Әхмәтгаян кызы, бухгалтер Эльвира Хәйдәр кызы, кадрлар бүлеге хезмәткәре Эльвира Нәзиф кызы Җиңүгә үз өлешләрен кертү өчен буш вакытларында штабка йөгерәләр. Һәр тасмага бу гүзәл ханымнарның мәхәббәте, ышанычы һәм өмете салынган. 

«Без үргән маскировка челтәре бер генә солдатны булса да үлемнән коткарса да, без — бәхетле», — ди туганнан туган ике энесе МХО зонасында хезмәт итүче Кифая Әхмәтгаян кызы. Бу төркемгә олы йөрәкле һәм киң күңелле хатын-кызлар җыелды, сугышчыларга ярдәм итү — алар өчен төп бурыч. Июнь аенда гына да 4 юнәлешкә — 430 нчы полк, 80 нче арктик бригада, 37 нче полк (Кременная), Херсонга — маскировка челтәрләре үреп җибәрелде. Балалар бакчасы хезмәткәрләре ай саен гуманитар ярдәм җыялар. Бу эшкә башка балалар бакчалары да кушылды. 

Шәһәрдәге 1, 3, 9, 17, 35, 37, 39, 44, 50, 60, 63, 64, 66, 78, 93 нче; Кама Аланындагы «Огонек» һәм Югары Чаллы авылы балалар бакчалары хезмәткәрләренең зур тырышлыклары мактауга лаек. Үзиреклеләр хәрәкәтендә актив катнашып, сугышчыларга даими ярдәм күрсәткән Ольга Григорьевна Трачковскаяга (63 нче балалар бакчасы) һәм Рәзинә Ирек кызы Мортазинага (78 нче балалар бакчасы), 71 нче башлангыч мәктәбе-балалар бакчасы директоры Наталья Геннадьевна Груздевага аеруча рәхмәт әйтәсе килә.

Май аенда «Яшь тамашачы театры» нда узган Рүзәл Минһаҗевның хәйрия концертында югарыда күрсәтелгән балалар бакчалары хезмәткәрләре «Вместе мы можем больше» хәрәкәтенең һәм «Казакларның сугышчан туганлыгы» ның Мактау грамоталары белән бүләкләнделәр. Шәһәрнең барлык педагогларына, үзиреклеләр хәрәкәте әгъзаларына, гуманитар ярдәм җыюда катнашучы ата-аналарга олы рәхмәт! 

Безнең «Пчелки» күп тапкырлар Оборона министрлыгының, Кеше хокуклары буенча вәкаләтле вәкиленең, «Казачество России» гомумроссия иҗтимагый оешмасының Татарстан Республикасы буенча төбәк бүлегенең Рәхмәт хатлары белән бүләкләнде, аларның һәркайсына «МХОга ярдәм иткән өчен» медале тапшырылды.

«Пчелки» — илбезнең чын патриотлары, тырыш хезмәтчәннәре, безнең балалар бакчасының йөзе һәм горурлыгы. Хезмәткәрләребез балалар бакчасының барлык хәйрия акцияләрендә актив катнашалар, үз тәрбияләнүчеләре өчен үрнәк булып торалар.

 Узган елның апрелендә Рәзилә Шәмсетдинова шәхсән үзе МХО зонасына волонтер булып барды, анда госпитальдә эшләде. Ел ахырында үз акчасына «УАЗ-буханка» машинасы һәм дрон сатып алды. Аны «Роллис» автосервисында ремонтлатып, сугышчыларга җибәрде. 

Быел март аенда исә Рәзилә Тимергали кызы ике тапкыр МХО зонасына гуманитар ярдәм белән барды. Әти-әниләре аның бу гамәлләрен хуплый. Әгъләмовлар гаиләсе мотоциклларын тапшыргач, ул аны да ремонтлатып, яралыларны эвакуацияләү өчен МХО зонасына илткән. «Җимерелгән йортларны, мохтаҗ кешеләрне, йортсыз калганнарны, ата-аналарын югалткан һәм сугышның барлык куркынычларын кичергән балаларны, яраланган сугышчыларны күргәч, тагын да күбрәк ярдәм итәсе килә», — ди Рәзилә Шәмсетдинова. 

Ул сугышчылар, җәмәгатьчелек, дини оешмалар, һәлак булган сугышчыларның әтиәниләре белән даими элемтәдә булып, «Пчелка» үзиреклеләре белән бергә хәйрия концертлары, шәһәр күләмендәге чаралар, үзәк Җәмигъ мәчетендә һәлак булган сугышчыларның ата-аналары белән очрашулар уздыруда катнаша. Үсеп килүче буынга патриотик тәрбия бирүне Разилә Шәмсетдинова мөһим бурыч дип саный. Балалар бакчасында тәрбияләнүче балалар да маскировка челтәрләре үрергә булыша. Шуларның берсе — биш яшьлек Рәсим Галиев сугышчылар өчен бик кирәкле «исән калу беләзекләрен» бик оста үрә. Балаларга бигрәк тә коры душ ясау ошый. «Пчелка» төркеме әгъзалары сугышчыларга ярдәм күрсәтеп кенә калмый, патриотик тәрбия бирү буенча да актив иҗтимагый эш алып бара.

Май аенда «Пчелки» төркеме әгъзалары Альмира Әсгам кызы һәм Лилия Изаил кызы белән бергә «БАЗА» креатив идеяләр үзәге администрациясе китапханәсендә маскировка челтәрләре һәм «исән калу беләзекләре» үрү буенча студент-төзелеш отрядлары өчен осталык дәресләре уздырдылар. «Пчелки» волонтерлары балалар бакчасында тәрбияләнүчеләр белән әңгәмәләр дә үткәрә, шулай ук башка бакчаларда тәрбияләнүчеләрне һәм 7 нче мәктәпнең башлангыч сыйныф укучыларын чакыра. Рәзилә Шәмсетдинова Кызыл Чишмә мәктәбенең 10 нчы сыйныфында осталык дәресе һәм «батырлык дәресе» үткәрде. 

Балалар бакчасының үзиреклеләр штабында бер стена Бөек Ватан сугышы геройларына, исемнәре шәһәребез урамнарына бирелгән геройларга багышланган. Икенче стена — геройларга-махсус хәрби операциядә катнашучыларга. Тирә-якта флаглар эленеп тора. Бирегә ялга кайткан сугышчылар да килә. Ә балалар бакчасы педагоглары укучыларга Бөек Ватан сугышы геройлары һәм МХОда катнашучылар турында сөйлиләр. 

Шулай ук биредә һәм башка мәктәпкәчә учреждениеләрдә дә тәрбияләнүче балаларның хәзерге вакытта МХОда хезмәт итүче әтиләренең портретлары да куелган. Балалар аларга карап горурланалар. 

Тимирясев исемендәге КИУ студентлары да штабта еш кунак була, алар маскировка челтәрләрен үрергә ярдәм итәләр. «Без бергә» шәһәр оешмасы әгъзалары Вера Боллих һәм Вера Барышникова да бу игелекле эштә актив ярдәмчеләр. «Пчелка» дан Альмира Әсгам кызы осталык дәресләре күрсәтте, ул КИУда Республика фәнни-гамәли конференциясендә дә катнашты. 

Быел безнең балалар бакчасы базасында май аенда мәктәпкәчә мәгариф оешмалары педагоглары арасында «Вехи Великой Победы» — «Җиңү кайтавазы» зона бәйгесе узды. Безнең «Пчелка» әгъзалары шулай ук маскировка челтәрләре һәм шлемнар үрүдә осталыклары белән уртаклаштылар. Анда Рәзилә Шәмсетдинова 2 нче урынны яулады. 

«Түбән Кама гуманитар үзәге» ассоциациясе, «Яхшылык эшлә» төркеме волонтеры буларак, безнең педагог башка үзиреклеләр белән өмәләрдә катнаша, елга, чишмә буйларын чистарта, шәһәребез чистарак һәм матуррак булсын өчен барысын да эшли. 

Разилә Шәмсетдинова онкологияне 2 стадиядә җиңеп, хезмәттәшләре белән бергә онкология белән авыручы балаларга ярдәм итә. Волонтерлык хәрәкәте әгъзалары хәйрия ярдәме белән Казан шәһәренең балалар онкология үзәгенә даими йөриләр. «Волонтерлык — ул күңел халәте», — дип саный Рәзилә Тимергали кызы. 

Рәзилә Тимергали кызы бетмәс-төкәнмәс энергиясе һәм оптимизмы өчен коллективыбызның хөрмәтен казанган, хезмәттәшләрен һәм дусларын игелекле эшләр дөньясына ияртеп, һәркемгә ярдәмгә килергә һәрвакыт әзер. Ул җитәкләгән «Пчелки» волонтерлар төркеменә ватаныбыз сагында торучы көрәшчеләр бик рәхмәтле. 

«Без барыбыз да җиңүгә бик ышанабыз һәм фронттагыларга бераз җылырак һәм җиңелрәк булсын өчен бар көчебезне куеп ярдәм итәргә тырышабыз», — ди «Пчелка» әгъзасы Энҗе Равил кызы.

Илмира Нәбиева, балалар бакчасы методисты
Фотолар шәхси архивтан.