Туган як

Авыл саен таралган

Керәшеннәрнең Олы көне (Пасха) алты атна буе ураза тотканнан соң бәйрәм ителә. Быел ураза 27 февральдә башланып 15 апрельгә кадәр дәвам итә. 15 апрельдә исә Олы көнне бәйрәм итәчәкбез. Табигать уянган чакта, Кышкы тунын салганда, Язгы бәйрәм - Паска көне Җитә бозлар акканда. Безнең Мамадыш районындагы Колышчы авылында Олы көнне...

Керәшеннәрнең Олы көне (Пасха) алты атна буе ураза тотканнан соң бәйрәм ителә. Быел ураза 27 февральдә башланып 15 апрельгә кадәр дәвам итә. 15 апрельдә исә Олы көнне бәйрәм итәчәкбез.
Табигать уянган чакта,
Кышкы тунын салганда,
Язгы бәйрәм - Паска көне
Җитә бозлар акканда.
Безнең Мамадыш районындагы Колышчы авылында Олы көнне күбрәк әнә шулай Паска дип йөртәләр.
Керәшеннәр өчен Олы көн - Иисус Христосның кабаттан терелеп торуы хөрмәтенә үткәрелә торган изге дини бәйрәм. Иртән-иртүк, әле яктыра гына башлаган бер чакта, балалар өйдән-өйгә кереп, күкәй җыеп йөргәндә, керә-керешкә:
- Христос терелеп торган, - диләр.
Хуҗалар да:
- Чыннан да терелеп торган, - дип җавап кайтаралар һәм сабыйларга төрле төскә буялган пешкән күкәй, күчтәнәч бирәләр.
Бу көнне бөтен халык иң затлы киемнәрен киеп, бер-берсенә кунакка йөрешә. Шушы бәйрәмгә атап асраган тәкәне, сарыкны алдан ук суеп куя.
Пасханы бәйрәм итү атна буена сузыла. Яшьләр төрле уеннар, шул исәптән, төрле төсләргә буялган күкәй белән отышлы уены уйнар өчен тауга яки болынга баралар. Безнең Мамадыш ягында бу иң кызыклы уеннарның берсе булып санала. Иң элек төрле төстәге күкәйләрне бер рәткә тезеп куялар. Шулар өстенә чүпрәктән тегелгән йомшак туп тәгәрәтеп җибәрәләр. Әгәр дә туп күкәйләргә тисә, ул кеше откан булып исәпләнә һәм туп тигән күкәйне үзенә ала да, уенны дәвам итә. Туп күкәйгә тимичә читкә тәгәрәсә, аны икенче уенчы алмаштыра... Шулай ук бу бәйрәмдә хәленнән килгән һәркем таган атына...
Яшьлекне артта калдырып, еллар узган саен, бу бәйрәм кадерлерәк була бара, күңелдә шигъри хисләр уята:
Олы көн ул борынгыдан,
Ата-бабадан калган.
Матур, олы бәйрәм булып,
Авыл саен таралган.

Нравится
Поделиться:
Реклама
Комментарии (0)
Осталось символов: